Илјадници дански војници започнаа најголема воена вежба од Студената војна

Илјадници војници денес започнаа воена вежба во Данска, која се опишува како најголема во земјата од времето на Студената војна, објави радиодифузерот ДР, јавува Анадолу.

Во вежбата „Блутут“ учествуваат припадници на данската доброволна воена сила, Домашната гарда, при што до 6.500 доброволци од копнените трупи на оваа гарда ќе учествуваат заедно со припадници на Поморската и Воздухопловната гарда.

Вежбата се одржува по неодамнешната процена на заканите од данските разузнавачки служби, кои предупредија дека Русија би можела да ги засили активностите во рамките на хибридната војна, вклучително и почести напади врз Западот и НАТО.

Цел на вежбата „Блутут“ е доброволните сили да се подготват за одговор на хибридна војна и акти на саботажа.

„Нашите задачи стануваат уште порелевантни. Тоа поставува одредени барања пред нас и треба донекаде да ја зголемиме нашата обука“, изјави генерал-мајор Гунер Арпе Нилсен за ДР.

Се очекува вежбата да трае до недела.