Кинескиот претседател Си ќе оствари државни посети на Киргистан и Египет

Кинескиот претседател Си Ѓинпинг оваа недела ќе оствари државна посета на две земји – Киргистан и Египет, соопшти денес Пекинг, пренесува Анадолу.

Си ќе отпатува за Бишкек во недела и ќе ја заврши посетата во четврток, соопшти кинеското Министерство за надворешни работи.

Ова ќе биде второ патување на Си во странство оваа година откако во јуни беше во државна посета на Северна Кореја.

Посетите ќе се реализираат на покана на киргистанскиот претседател Садир Жапаров и египетскиот претседател Абдел Фатах ал-Сиси, се додава во соопштението.

Си во Бишкек ќе присуствува на самитот на Шангајската организација за соработка (ШОС).

Портпаролот на кинеското Министерство за надворешни работи, Лин Ѓен, изјави дека Кина и Киргистан се „добри соседи“, „добри пријатели со меѓусебна доверба и добри партнери со заеднички цели“.

Двете земји воспоставиле дипломатски односи пред 34 години и се однесувале една кон друга со „искреност“, поставувајќи пример на меѓусебна поддршка, рече Лин, додавајќи дека односите се развивале со „огромни чекори“, со зајакнување на меѓусебната политичка доверба.

Претстојното патување претставува можност за „промовирање висококвалитетен развој“, им изјави Лин на новинарите во Пекинг, истакнувајќи дека билатералната трговија во последните години надминала 27 милијарди долари.

- Прва државна посета на Египет по 10 години -

Лин изјави дека Египет бил прва арапска и африканска земја што воспоставила дипломатски односи со Кина пред 70 години, додавајќи дека билатералната трговија надминала 10 милијарди долари.

„Кина и Египет ја продлабочија меѓусебната политичка доверба, постигнаа плодни резултати и соработка во различни области“, рече Лин, додавајќи дека претстојното патување ќе биде прва државна посета на Си на Египет по 10 години.

Опишувајќи ја посетата како посета од „големо значење“, Лин рече дека Си и Сиси ќе разменат мислења за билатералните односи, како и за меѓународни и регионални прашања од заеднички интерес.

Кина „со нетрпение очекува да соработува со Египет за продолжување на традиционалното пријателство, за давање цврста меѓусебна поддршка и зајакнување на меѓусебната модернизација и да даде позитивен придонес за мирот и стабилноста во регионот и пошироко“, рече Лин.

Патувањето на Си во Египет се одвива во време кога армиите на двете земји одржуваат заеднички вежби на воздухопловните сили, наречени „Орли на цивилизацијата“, во северноафриканската земја.

Кинеските воздухопловни сили на Народноослободителната армија распоредија борбени авиони Ј-16, авиони-танкери за воздушно полнење ЈУ-20, авиони за рано предупредување и воздушна контрола КЈ-500 и хеликоптери З-20, кои минатата недела прелетаа околу 6.000 километри до Египет, пред почетокот на заедничките вежби во саботата.

Египет, меѓу другите воени средства, за вежбите распореди борбени авиони „Рафал“ од француско производство.