Австралискиот премиер повика на посилна меѓународна акција за Палестина и Иран во ОН

Австралискиот премиер Ентони Албаниз повика на посилна меѓународна акција во врска со Палестина, Иран и ризиците што ги носи вештачката интелигенција (ВИ), предупредувајќи го Генералното собрание на Обединетите нации (ОН) дека мултилатералниот систем е под сè поголем притисок, јавува Анадолу.

Обраќајќи се пред Генералното собрание во Њујорк вчера, Албаниз рече дека Австралија и понатаму ќе се спротивставува на нелегалните израелски населби на окупираниот Западен Брег, истовремено отфрлајќи каква било идна улога на Хамас во Палестина.

„Ќе продолжиме да зборуваме против дејствата што ја загрозуваат перспективата за мир, вклучително и нелегалните населби на Западниот Брег“, рече тој, додавајќи дека Канбера „ќе продолжи да се спротивставува на каква било улога на терористите од Хамас во иднината на Палестина“.

Осврнувајќи се на Иран, Албаниз рече дека конфликтот предизвикал „тешки последици за Блискиот Исток“ и „разорни последици врз глобалната економија“.

Тој рече дека Австралија повикува на прекин на огнот, повторно отворање на Ормускиот Теснец и обновување на слободата на пловидба и трговија. Тој, исто така, го повика Иран да ги прекине „неселективните напади“ низ регионот и да се откаже од какви било напори за стекнување нуклеарно оружје.

Дел од своето обраќање Албаниз ѝ посвети на вештачката интелигенција, наведувајќи дека технологијата може да ги трансформира здравствената заштита, продуктивноста и економскиот раст, но дека без заштитни механизми носи значителни ризици.

„Не можеме да ја игнорираме ВИ или да ја спречиме“, рече тој, оценувајќи дека владите мора „да го обликуваат развојот на вештачката интелигенција наместо пасивно да бидат обликувани од неа“.

Тој рече дека неодамна систем со вештачка интелигенција се инфилтрирал на веб-страница на австралиската Влада, опишувајќи го инцидентот како „неприфатлив“, а ги наведе и напорите на Австралија за воспоставување стандарди за регулирање на технологијата.

Албаниз, исто така, повика на реформа на ОН, поголема застапеност на малите и средните сили и посилна меѓународна акција во однос на климатските промени.

„Австралија се залага за побезбеден свет, во кој ниедна земја не доминира и со ниедна земја не се доминира“, рече тој, ветувајќи дека ќе се заложи за поголема застапеност на гласот на пацифичките земји во однос на климатските промени, развојот и безбедноста.