Иран: Посетата на началникот на пакистанската Армија во Техеран донесе значајни дипломатски достигнувања

Иран денес соопшти дека посетата на началникот на пакистанската Армија на Техеран била „многу продуктивна“ и донела „значајни дипломатски достигнувања“, а резултатите „ќе станат очигледни наскоро“, пренесува Анадолу.

„Спротивно на некои неточни медиумски шпекулации, посетата на фелдмаршалот Асим Мунир, началникот на Армијата на пријателски Пакистан, на Иран беше многу продуктивна и донесе значајни дипломатски достигнувања, чии резултати наскоро ќе станат очигледни“, соопшти Сејед Мехди Табатабаеи, од канцеларијата за комуникации и информации во Кабинетот на иранскиот претседател, преку американската компанија за социјални медиуми X.

Мунир го посети Техеран вчера, каде што се сретна со иранскиот претседател Масуд Пезешкијан, претседателот на Парламентот и главен преговарач Мухамед Багер Калибаф, членот на Врховниот совет за национална безбедност Мохсен Резаеи и министерот за внатрешни работи Ескандар Момени.

Според пакистанската војска, разговорите се фокусирале на спречување на понатамошна ескалација, повторно отворање на Ормускиот Теснец и на напорите за прекин на конфликтот Иран - САД, како и начините за постигнување договорно решение.

Пакистанскиот министер за внатрешни работи Мохсин Накви, кој го придружуваше Мунир, рече дека во разговорите се разгледале и чекорите потребни од Техеран и Вашингтон за враќање на Меморандумот за разбирање од Исламабад и движење кон сеопфатно решение.

Накви денес изјави дека за време на посетата е постигнат „значаен напредок“, без да даде детали.

Иран и САД потпишаа Меморандум за разбирање од 14 точки во јуни, чија цел беше да се стави крај на војната, но привремениот договор брзо пропадна.