Lina Altawell
22 Септември 2026•Ажурирано: 22 Септември 2026
Привремените сили на ОН во Либан (УНИФИЛ) денес соопштија дека мирот во јужен Либан и понатаму е „неостварлив“, нагласувајќи дека трајното ставање крај на конфликтот бара политичка волја од страните, јавува Анадолу.
Изјавата беше објавена по повод Меѓународниот ден на мирот, кој се одбележува секоја година на 21 септември, а УНИФИЛ го одбележа синоќа со церемонија во своето седиште во јужнолибанскиот град Накура.
„Денес мирот во јужен Либан и понатаму е неостварлив, но надежта за мир опстојува“, соопшти УНИФИЛ, нагласувајќи дека трајниот мир бара „политички обврски и решенија од самите страни“.
„Мировниците можат да помогнат во обновувањето на стабилноста, спречувањето недоразбирања и намалувањето на ризикот од ескалација – но не можат да ја заменат политичката волја и одлуките неопходни за трајно ставање крај на конфликтот“, се наведува во соопштението.
„Мирот не е нешто на кое се посветуваме еднаш годишно; тој е трајна одговорност“, рече генерал-мајор Диодато Абањара, шеф на мисијата на УНИФИЛ и командант на силите.
„Ние патролираме, ги одржуваме отворени каналите за комуникација со страните за да го намалиме ризикот од недоразбирања и ескалација. Работиме со Либанските вооружени сили додека тие преземаат поголеми одговорности на југот“, рече Абањара.
Тој нагласи дека одговорноста за постигнување политичко решение е на страните, додека „УНИФИЛ ќе продолжи да го исполнува својот дел, одржувајќи ја комуникацијата отворена, намалувајќи го ризикот од ескалација и поддржувајќи ги дипломатските напори“.
Целосното спроведување на резолуцијата 1701 на Советот за безбедност на ОН „останува цел и основа за траен мир и стабилност во јужен Либан“, додаде Абањара.
„Континуираната соработка меѓу Либанските вооружени сили и мировниците останува клучна за одржување на стабилноста и поддршка на проширувањето на државната власт на југот“, додаде тој.
Советот за безбедност на ОН ја усвои резолуцијата 1701 во август 2006 година, по 33-дневната војна меѓу израелската Армија и Хезболах.
Резолуцијата повикува на целосен прекин на непријателствата меѓу Либан и Израел и на воспоставување зона меѓу Сината линија и реката Литани во јужен Либан без оружје и вооружен персонал, со исклучок на припадниците на либанската Армија и УНИФИЛ.
- Нарушена егзистенција -
УНИФИЛ соопшти дека актуелниот конфликт принудил илјадници луѓе да ги напуштат своите домови, при што многумина и натаму се раселени.
„Тоа ја наруши егзистенцијата на луѓето, предизвика широко распространета штета на домовите и инфраструктурата и резултираше со загинување и повредување цивили“, додаде мисијата.
Овогодишниот Меѓународен ден на мирот е последен што УНИФИЛ ќе го одбележи пред истекот на нејзиниот мандат на крајот на 2026 година, по одлуката на Советот за безбедност на ОН од 2025 година за прекин на мисијата.
Генералното собрание на ОН го воспостави Меѓународниот ден на мирот во 1981 година со цел промовирање прекини на огнот, ненасилство, толеранција, правда и човекови права.
Според либанските власти, израелските напади врз Либан од 2 март досега усмртиле најмалку 4.386 лица, повредиле 12.407 и раселиле повеќе од еден милион луѓе.
Нападите продолжија и покрај тоа што двете земји на 26 јуни потпишаа рамковен договор со посредство на САД, кој предвидува постепено израелско повлекување од окупираната либанска територија во замена за распоредување на либанската Армија и разоружување на Хезболах.
Израел окупира области во јужен Либан, некои со децении, а други од војната во 2023-2024 година, додека израелските сили во тековната офанзива навлегле повеќе од 10 километри.
