Новата унгарска Влада ја означи Русија како „закана“

Новата унгарска Влада, која ја презеде функцијата во мај, ја означи Русија како „закана“ во новоусвоениот официјален документ, јавува Анадолу.

Документот, објавен во унгарскиот Службен весник во текот на ноќта, е подготвен за Генералното собрание на ОН и е потпишан од премиерот Петер Маѓар.

Во него се утврдени насоките за унгарската делегација на Генералното собрание на ОН во септември.

„Унгарија ја осудува руската воена агресија, безрезервно ги поддржува суверенитетот и територијалниот интегритет на Украина во рамките на нејзините меѓународно признати граници и го признава правото на Украина на самоодбрана“, се наведува во документот.

Понатаму се вели: „Однесувањето на Русија претставува закана за Унгарија, Европа и глобалниот поредок, а исто така го доведува во сериозна опасност унгарското малцинство што живее во Карпатскиот Регион.“

Во исто време, новата Влада во документот нагласува дека „ги поддржува сите напори насочени кон водење преговори со цел постигнување траен мир и долгорочни безбедносни гаранции“.

Осудата на Русија претставува јасен прекин со надворешнополитичкиот пристап на претходната Влада предводена од Виктор Орбан, која водеше политика попријателски настроена кон Москва.

Во март, лидерите на ЕУ остро го критикуваа тогашниот унгарски премиер Виктор Орбан поради блокирањето на пакетот за заем во износ од 90 милијарди евра наменет за Украина.

Тие го обвинија дека „го поткопува единството и кредибилитетот на Унијата“.