Повеќе од 80 повредени во ноќните напади на Русија и Украина

Повеќе од 80 лица се повредени, додека Русија и Украина денес меѓусебно се обвинија за воздушните напади извршени во текот на ноќта, пренесува Анадолу.

Во Украина, гувернерот на Харковската Област, Олех Сињехубов, во објава на Телеграм соопшти дека повеќе од 62 лица биле повредени во руски напад врз медицинска установа во населбата Немишљански во регионалниот центар.

„Оштетена е зграда во која се наоѓа едно од медицинските одделенија, како и прозорците на четири повеќекатни станбени згради и 10 патнички автомобили“, рече Сињехубов.

Тој додаде дека 226 пациенти од установата биле евакуирани во други здравствени установи.

Во меѓувреме, гувернерот на Дњепропетровската Област, Олександр Ханжа, соопшти дека во утринските напади во регионот биле повредени 17 лица.

Во јужната област Одеса, гувернерот Олех Кипер изјави дека енергетската и цивилната инфраструктура во јужниот дел на регионот претрпеле штета, што довело до прекини во снабдувањето со електрична енергија.

„Надлежните стручни екипи веќе работат на санирање на штетата. Оштетени се и административни згради, магацини и производствени погони во претпријатие од прехранбената индустрија. За среќа, нема жртви“, рече Кипер.

Одделно, гувернерот на Житомирската Област, Виталиј Бунечко, соопшти дека енергетските објекти во регионот биле нападнати, по што околу 130 населени места и повеќе од 180.000 корисници останале без електрична енергија.

Воздухопловните сили на Украина соопштија дека противвоздушната одбрана соборила три балистички ракети, речиси 50 крстосувачки ракети и 257 од вкупно 289 дронови што Русија ги лансирала во текот на ноќта.

Руското Министерство за одбрана соопшти дека извршило „масовни“ ноќни напади врз Украина, при што, како што наведе, биле погодени објекти на енергетската инфраструктура во украинските области Виница, Дњепропетровск и Харков, кои „снабдуваат со електрична енергија претпријатија од воено-индустрискиот комплекс“ и украинската Армија.

Министерството, исто така, тврдеше дека била погодена пристанишната инфраструктура во Одеса, како и два брода за превоз на сув товар во пристаништето Пивдени.

Во друга изјава, Министерството соопшти дека руската противвоздушна одбрана соборила 856 украински дронови над 14 региони, како и над Црното Море и Крим, кој Москва незаконски го анектираше во 2014 година.

Во Русија, гувернерот на Јарославската Област, Михаил Евраев, соопшти дека двајца вработени се здобиле со повреди од шрапнели и биле хоспитализирани по украински напад со дронови врз рафинерија за нафта во регионалниот центар, која претрпела материјална штета.

Евраев тврдеше дека биле пресретнати вкупно 124 дрона, додавајќи дека остатоците од соборените дронови ги скршиле прозорците на неколку станбени згради и приватни домови, а биле оштетени и лични возила на жителите.

Независната проверка на тврдењата на Русија и Украина е отежната поради војната што е во тек.

Двете страни негираат дека намерно гаѓаат цивилна инфраструктура, тврдејќи дека нападите се насочени исклучиво кон воени цели или објекти поврзани со воени активности.