Русија и Украина меѓусебно се обвинуваат за ноќните воздушни напади, загинаа три лица

Русија и Украина денес разменија обвинувања во врска со ноќните напади, во кои загинаа три лица, а повеќе од 10 се повредени, пренесува Анадолу.

Гувернерот на Пермскиот Регион, Дмитриј Махонин, во објавата на Телеграм соопшти дека противвоздушната одбрана во регионот соборила 39 беспилотни летала за време на ноќните напади, при што, како што наведе, едно лице починало од повредите добиени во нападот.

„Во тек се операции за расчистување по нападот со дрон врз индустриски објект. Итните служби работат на местото на настанот“, додаде Махонин.

Во Улјановскиот Регион, гувернерот Алексеј Руских изјави дека во ноќните напади украинските беспилотни летала предизвикале оштетувања на индустриска и цивилна инфраструктура.

„Според прелиминарните податоци, повредени се осум лица – седуммина возрасни и едно дете“, рече Руских, додавајќи дека петмина од повредените се во умерено тешка состојба.

Александар Гусев, гувернер на рускиот пограничен Воронежски Регион, соопшти дека четири лица биле повредени во регионалниот главен град, додека тврдеше дека во текот на ноќните напади биле соборени 88 украински беспилотни летала.

Гусев наведе дека две од повредените лица биле хоспитализирани во умерено тешка состојба и дека од остатоците на соборените беспилотни летала се оштетени неколку нестанбени и индустриски објекти.

На нафтената рафинерија во Новошахтинск е предизвикано оштетувања и привремено работењето е прекинато, соопшти гувернерот на Ростовскиот Регион, Јуриј Сљусар, додавајќи дека во нападот врз регионот нема жртви.

Руското Министерство за одбрана соопшти дека руската противвоздушна одбрана во текот на ноќта соборила 592 украински беспилотни летала над 18 региони, како и над Црното Море и Крим, кој Русија нелегално го анектираше во 2014 година.

– Напади врз Украина -

Министерството дополнително тврдеше дека во текот на ноќта во руските напади е погодена локација за составување и складирање беспилотни летала во сопственост на украинската компанија за одбранбена технологија „Фајр Поинт“ во градот Бориспил во Киевскиот Регион.

Исто така, се тврди дека биле погодени два логистички центра во јужниот украински град Одеса и во селото Нерубајске, како и пристанишна инфраструктура и три складишта во пристаништето Рени и брод за превоз на сув товар што пловел кон пристаништето Одеса, за кои се тврди дека се користат за поддршка на украинската војска.

Гувернерот на Киевскиот Регион, Тимур Ткаченко, изјави дека производствен објект бил оштетен во округот Бориспил, а била оштетена и магацинска зграда во округот Бровари и три приватни куќи во округот Обухив.

„На вкупно девет објекти во регионот се предизвикани оштетувања. Според прелиминарните информации, нема жртви. Итните служби работат на отстранување на последиците од нападот“, додаде Ткаченко.

Оштетувања се пријавени и во украинската престолнина, при што Киевската градска воена управа соопшти дека едно лице е повредено, а во неколку окрузи биле погодени станбени и нестанбени објекти. Подоцна беше соопштено дека едно лице загинало во нападите.

Во Одескиот Регион, гувернерот Олех Кипер изјави дека едно лице загинало, а едно било повредено во руските напади врз станбена област и логистички објекти на поштенската служба.

Украинските воздухопловни сили соопштија дека собориле 267 од 295 беспилотни летала што Русија ги лансирала во текот на ноќта.

Во последните месеци Русија и Украина ги интензивираа нападите, при што цел се логистички центри, пристаништа и енергетска инфраструктура на другата страна.

И Русија и Украина негираат дека намерно гаѓаат цивилна инфраструктура, наведувајќи дека нивните напади се насочени кон воени цели или објекти поврзани со воени активности.