Северна Кореја соопшти дека спровела „заедничка вежба за напад“ со артилериски единици и ракети со голем дострел

Северна Кореја денес соопшти дека нејзината војска спровела „заедничка вежба за напад со боево оружје“ во која учествувале артилериски единици со користење ракети со долг дострел, еден ден откако САД, Јужна Кореја и Јапонија ги завршија заедничките воени вежби, објави државната новинска агенција КЦНА, пренесува Анадолу.

Вежбата се одржа во саботата и вклучуваше избрани подединици од пет артилериски и ракетни единици на Корејската народна армија (КНА).

Вежбата вклучуваше „нови борбени системи“, како разни дронови за напад, тактички крстосувачки ракети, термобарични повеќекратни ракетни фрлачи со голем калибар и тактички балистички ракети.

Маршалот на КНА, Пак Џонг Чон, потпретседател на Централната воена комисија на владејачката Работничка партија, и директорот на Бирото за артилерија, генерал-мајор Ју Чанг Сон, ја надгледуваа вежбата.

КЦНА објави дека сите системи за напад ги погодиле своите цели со „100-процентна прецизност“, демонстрирајќи ја нивната способност да спроведуваат истовремени концентрирани напади.

Ју рече дека ваквите вежби имаат за цел да ја зајакнат стратегиската позиција за контранапад на војската и да ги подобрат можностите за брз одговор на единиците за време на вонредни ситуации.

Американската војска во петокот соопшти дека следи повеќе севернокорејски лансирања на ракети, но процени дека тие не претставуваат непосредна закана за американскиот персонал, територија или регионални сојузници.

Лансирањата се случија по еден ден откако Јужна Кореја, САД и Јапонија ја завршија својата петдневна трилатерална поморска вежба „Фридом еџ“ во меѓународни води крај јужниот остров Чеџу во Јужна Кореја.