Студија: Пасивното пушење поврзано со речиси 1,7 милиони смртни случаи во 2023 година

Речиси 1,7 милиони луѓе во светот починале од изложеност на пасивно пушење во 2023 година, според студија објавена денес, јавува Анадолу.

Пасивното пушење е чад што го вдишуваат луѓе кои се во близина на некој што користи тутунски производи.

Повеќе од 2,7 милијарди луѓе во светот, вклучувајќи околу 767 милиони деца, биле изложени на пасивно пушење во 2023 година, според студијата објавена во „Лансет паблик хелт“.

Истражувачите испитале податоци од 204 земји и територии помеѓу 1990 и 2023 година и откриле дека изложеноста на пасивно пушење е поврзана со 1,66 милиони смртни случаи и 44,8 милиони години здрав живот изгубени во 2023 година.

Исхемичното срцево заболување било водечка причина за смрт поврзана со изложеност на пасивно пушење кај возрасните, додека изложеноста била поврзана и со 5,2 милиони инфекции на долните дишни патишта кај децата во 2023 година, покажа студијата.

Иако процентот на луѓе изложени на пасивно пушење се намали од 1990 година, вкупниот број остана генерално стабилен како резултат на растот на населението, при што изложеноста особено се зголемува во делови од Африка и Блискиот Исток.

Истражувачите рекоа дека пасивното пушење останува голем глобален здравствен ризик и повикаа на построги мерки за контрола на тутунот за заштита на луѓето, особено жените и децата.