Тајфунот „Дуџуан“ однесе два живота, четворица се водат како исчезнати во Јапонија

Најмалку две лица загинаа, а четири други се водат како исчезнати откако тајфунот „Дуџуан“ донесе рекордни врнежи, поплави и одрони во делови од Јапонија, објавија државните медиуми денес, пренесува Анадолу.

Бурата донесе рекордни врнежи во регионот Канто и на островите во близина на Токио, предизвикувајќи поплави и одрони, објави јавниот радиодифузен сервис НХК.

Јапонската метеоролошка агенција издаде предупредување од ниво 5 за одрони, највисокото ниво на тревога во земјата, и ги повика жителите во погодените области да останат внимателни.

Иако тајфунот се оддалечува од Јапонија, поплавите продолжија во делови од префектурата Чиба, во близина на Токио.

Одрони беа пријавени и во Јокосука, во соседната префектура Канагава.

Две лица загинаа во Чиба и Канагава, додека продолжија операциите за пребарување и спасување на најмалку четири други лица кои се водат како исчезнати откако нивните домови биле погодени од одрони.