NATO: Vendimi për rihapjen e urës në Mitrovicë duhet të bazohet në nevojat e komuniteteve

Zyrtarë të NATO-s kanë deklaruar se tranzicioni gradual i pranisë së përhershme të KFOR-it në urën kryesore në Mitrovicë do të jetë i bazuar në kushtet e sigurisë dhe i kthyeshëm, nëse zhvillimet përkatëse të sigurisë e kërkojnë këtë, transmeton Anadolu.

NATO në një përgjigje për televizionin publik të Kosovës vlerësoi se çdo vendim për rihapjen e mundshme të urës për qarkullimin e automjeteve duhet të marrë parasysh nevojat e të gjitha komuniteteve lokale.

Sipas NATO-s, ndryshimi i pranisë së KFOR-it në urë po bëhet në përputhje me përmirësimin e situatës së sigurisë në Kosovë dhe është pjesë e procesit të optimizimit të pozicionimit të misionit të NATO-s në Kosovë.

NATO thotë se ky proces po zhvillohet me transparencë të plotë ndaj të gjithë aktorëve të përfshirë.

Nga selia e Aleancës u konfirmua gjithashtu se sekretari i përgjithshëm i NATO-s, Mark Rutte, është në kontakt të rregullt me presidentin serb, Aleksandar Vuçiq.

Zyrtarët e NATO-s konfirmojnë se KFOR-i vazhdon të monitorojë zhvillimet në terren dhe mbetet plotësisht i përqendruar në zbatimin e përditshëm të mandatit të tij.

"KFOR-i nuk ka mandat për zbatimin e ligjit. Ai vazhdon të bashkëpunojë ngushtë me organizatat e sigurisë në Kosovë, përfshirë Policinë e Kosovës, në përputhje me standardet më të larta operacionale dhe me parimin e trajtimit të drejtë dhe të barabartë të të gjitha komuniteteve", thuhet në përgjigjen e zyrës për media të NATO-s.

Në përgjigje shtohet gjithashtu se KFOR-i mban një prani të fuqishme dhe të dukshme në veri të Kosovës, në dobi të të gjitha komuniteteve, përfshirë komunitetin serb.