Burak Dağ
12 janar 2021•Përditësim: 13 janar 2021
Bashkimi Evropian (BE) të hënën i bëri thirrje Iranit të braktisë përpjekjet e tij për të pasuruar uraniumin deri në 20 për qind dhe të përmbushë detyrimet e marrëveshjes bërthamore që nënshkroi në vitin 2015, transmeton Anadolu Agency (AA).
Në një deklaratë, shefi i politikës së jashtme të BE-së Josep Borrell tha se blloku vazhdon të mbështesë Planin e Përbashkët të Përgjithshëm të Veprimit (JCPOA) të nënshkruar midis Iranit dhe fuqive globale.
Borrell tha se fillimi i pasurimit të uraniumit nga Irani deri në 20 për qind në objektin e tij Fordo është "një zhvillim serioz dhe një çështje shqetësuese e thellë", duke shtuar se nuk përputhet me marrëveshjen.
Duke theksuar se e pranojnë se çështja u shkaktua nga tërheqja e njëanshme e SHBA-së nga marrëveshja dhe rifillimi i sanksioneve ndaj Iranit, Borrell vuri në dukje se BE-ja mbeti besnike ndaj angazhimeve të saj dhe hoqi sanksionet.
Ai tha se po punojnë për vazhdimin e marrëveshjes pavarësisht të gjitha vështirësive dhe përpjekjet mbështetëse për kthimin e SHBA-së në marrëveshje dhe pajtueshmërinë e plotë të Iranit.
"I bëjmë thirrje Iranit të shmangë rritjen e tensioneve dhe të ndërrojë drejtimin e tij aktual pa qenë vonë", tha Borrell.
Borrell po ashtu tha se ata janë të kënaqur me deklaratat pozitive të presidentit të zgjedhur të SHBA-së Joe Biden në lidhje me marrëveshjen bërthamore të nënshkruar me Iranin dhe ata po presin me padurim të punojnë me administratën e re të SHBA-së.
Më 2 janar të këtij viti, Irani konfirmoi një plan për të rritur pasurimin e uraniumit deri në 20 për qind si një kundërmasë ndaj sanksioneve të SHBA-së.
Marrëveshja bërthamore u nënshkrua në vitin 2015 nga Irani, SHBA-ja, Kina, Rusia, Franca, Britania, Gjermania dhe BE-ja.
SHBA-ja në mënyrë të njëanshme u tërhoq nga marrëveshja në vitin 2018. Pas konfrontimeve me SHBA-në, Irani vitin e kaluar njoftoi se ka ndaluar së përmbushuri marrëveshjen bërthamore të vitit 2015.
