Biden: Besoj se Rusia do ta sulmojë Ukrainën

Presidenti i SHBA-së, Joe Biden deklaroi të mërkurën se ai beson se Rusia do ta pushtojë Ukrainën ndërsa vazhdon të paralajmërojë homologun e tij Vladimir Putin për pasojat shkatërruese nëse ai e bën këtë, transmeton Anadolu Agency (AA).

"Mendoj se ai do të futet. Ai diçka do të bëjë", tha Biden gjatë një konference dy orëshe për media.

Biden mbrojti vlerësimin e tij, duke thënë se nuk beson se presidenti rus ka marrë një vendim përfundimtar nëse do të vazhdojë apo jo pushtimin e Ukrainës, por paralajmëroi se do të pasojë përgjigje e koordinuar amerikano-evropiane që do të ishte shumë larg kësteve të mëparshme të sanksioneve të vendosura ndaj Moskës për aktivitetet e kaluara.

"Nëse ata në të vërtetë bëjnë atë që janë në gjendje të bëjnë me forcat e grumbulluara në kufi, do të jetë një fatkeqësi për Rusinë nëse ata pushtojnë Ukrainën, aleatët dhe partnerët tanë janë gati të imponojnë kosto të rënda duke i shkaktuar dëm të konsiderueshëm Rusisë dhe ekonomisë ruse ndërsa ne do të forcojmë aleatët tanë të NATO-s. U kam thënë atyre, në krahun tonë lindor”, paralajmëroi Biden.

SHBA-ja së bashku me aleatët e saj evropianë kanë paralajmëruar se Rusia po përgatit skenarin për pushtimin e Ukrainës dhe ka vendosur paraprakisht mbi 100 mijë trupa në kufirin e saj me ish-republikën sovjetike, së bashku me dislokime të konsiderueshme të artilerisë dhe tankeve. Moska ka mohuar përgatitjet për një ofensivë ushtarake, duke thënë se trupat e saj janë atje për stërvitje të rregullta.

Zëvendësministri i Jashtëm rus, Sergey Ryabkov deklaroi më herët të mërkurën se Moska nuk ka plane për të pushtuar Ukrainën, edhe nëse bisedimet e vazhdueshme për të ulur tensionet dështojnë, duke thënë se "ne nuk do të sulmojmë, godasim, 'pushtojmë', apo çfarëdo qoftë tjetër Ukrainën".

Kremlini ka kërkuar garanci nga Perëndimi që të mos lejojë kurrë që Ukraina dhe Gjeorgjia të bashkohen me NATO-n, kërkesa që janë hedhur poshtë si të papranueshme nga Aleanca, e cila thotë se anëtarësimi është i hapur për të gjithë dhe është një vendim sovran kombëtar.

Biden tha se nëse presidenti rus do të vazhdojë me një pushtim, ai do të paguajë një "çmim serioz dhe të lartë", duke treguar se sanksionet e mundshme përfshijnë kufizime të qasjes në sistemin bankar ndërkombëtar, përfshirë ndalimin e qasjes në transaksionet e bazuara në dollarë.

Përveç kësaj, ushtria ruse do të pësonte humbje "të rënda" në fushën e betejës, pjesërisht për shkak se SHBA-ja u ka ofruar forcave të armatosura ukrainase "pajisje të sofistikuara ushtarake", tha Biden. Kjo ka përfshirë dërgesat e njëpasnjëshme të municioneve antitank Javelin dhe raketave anti-ajrore Stinger.

“Ushtarakisht, ata kanë epërsi dërmuese në raport me Ukrainën, por ata do të paguajnë një çmim të lartë menjëherë, afatshkurtër dhe afatgjatë, nëse e bëjnë këtë”, tha Biden duke aluduar në forcat ruse.