Britania dënon sulmet ndaj Idlibit

Sekretari i Jashtëm britanik, Dominic Raab, lidhur me sulmet në Idlib tha se "Britania dënon shkeljen në mënyrë të përsëritur të ligjit ndërkombëtar humanitar", transmeton Anadolu Agency (AA).

Ministria britanike bëri një deklaratë lidhur me sulmet e regjimit të Asadit të ndërmarra kundër Idlibit në Siri.

Në deklaratën rikujtohet se regjimi ditët e fundit ka marrë nën kontroll rajonin Maarat Al-Numan. "Sulmet ruse dhe të regjimit të cilat vazhdojnë që prej muajit prill kanë vrarë më shumë se 1.500 civilë dhe kanë zhvendosur qindra mijëra të tjerë", thuhet në deklaratën e ministrisë.

Britania u bashkohet thirrjeve në Këshillin e Sigurimit të Kombeve të Bashkuara (KS-OKB) për arritjen e një zgjidhjeje politike dhe ndalimin e menjëhershëm të armiqësive.

"Fushata e tmerrshme duke shënjestruar shkollat, spitalet dhe ekipet e ndërhyrjes së shpejtë vazhdon të detyrojë civilët të largohen. Britania dënon shkeljen në mënyrë të përsëritur të ligjit ndërkombëtar humanitar", tha ministri Raab.

Ai thekson se vetëm një zgjidhje politike në përputhje me rezolutat e OKB-së do të mund të sigurojë paqe të përhershme në Siri.