Kremlini mirëpret nismën e AfD-së gjermane për dialog me Rusinë

Kremlini deklaroi sot se mirëpret dëshirën e partisë së djathtë gjermane Alternativa për Gjermaninë (AfD) për dialog me Rusinë, transmeton Anadolu.

Duke folur para gazetarëve gjatë një konference për media, zëdhënësi i Kremlinit, Dmitry Peskov tha se nuk ka informacion për përpjekjet e raportuara të AfD-së për të vendosur kontakte me Moskën.

"Megjithatë, si një forcë politike gjermane, popullariteti i së cilës po rritet vazhdimisht dhe e cila mbron vlerën e ndërtimit të marrëdhënieve me vendin tonë, ajo sigurisht që na tërheq", tha Peskov duke thënë se deklarata të tilla janë "shumë më të favorshme për ne" sesa ato që ai i cilësoi si "konfrontuese" të kancelarit gjerman Friedrich Merz.

Deklaratat e Peskovit vijnë një ditë pasi AfD-ja bëri thirrje për "një qasje tjetër ndaj paqes dhe diplomacisë" për t'i dhënë fund luftës së vazhdueshme Rusi-Ukrainë, duke i bërë thirrje Merzit të vizitojë Moskën për bisedime.

"Ne duam bashkëpunim të mirë me të gjitha fuqitë e mëdha, si me Amerikën, ashtu edhe me Kinën. Politika e sanksioneve (kundër Rusisë) ka dëmtuar kryesisht ekonominë gjermane", tha bashkëkryetari i AfD-së, Tino Chrupalla, në një konferencë për media në Berlin.

AfD-ja fitoi zgjedhjet rajonale në Mecklenburg-Vorpommern, fitoren e dytë në një land në vetëm dy javë ndërsa Unioni Demokristian (CDU) i Merzit shënoi rezultatin më të dobët në historinë e tij 81-vjeçare, sipas rezultateve paraprake.

CDU-ja nuk arriti të hyjë në parlamentin e landit verilindor me vetëm 4,9 për qind të votave, nga 13,3 për qind në zgjedhjet e fundit në vitin 2021 dhe pak nën pragun prej 5 për qind. AfD-ja mori rreth 38,2 për qind të votave, duke lënë pas Socialdemokratët e qendrës së majtë (SPD) me 35,5 për qind, sipas komisionit zgjedhor.