Ahmet Gürhan Kartal
28 Gusht 2020•Përditësim: 28 Gusht 2020
Një person ka humbur jetën në sulmin e ariut polar në një vend kampingu në ishullin e vogël norvegjez Svalbard, njoftojnë mediat lokale, transmeton Anadolu Agency (AA).
Incidenti ndodhi herët sot në mëngjes në afërsi të aeroportit Longyearbyen, njoftoi faqja e internetit "Live" në Norvegji.
"Një person në kamping u plagos pasi u sulmua nga një ari polar", tha ndihmës guvernatori, Sølvi Elvedahl. "Na thanë gjithashtu se është shtënë pas ariut polar por vendndodhja e ariut ishte e panjohur", tha ai.
Burri i plagosur është dërguar në spital por mjeku konfirmoi vdekjen e tij.
Forcat lokale të sigurisë më vonë gjetën ariun të ngordhur në parkingun e aeroportit.
Kreu i Këshillit, Arild Olsen i tha gazetës lokale "Svalbardposten" se incidenti kishte tronditur të gjithë qytetin.
"Tani ne jemi duke punuar para së gjithash që të kujdesemi për ata që ishin më afër incidentit dhe të ndihmojnë sa më shumë që mundemi", tha ai.
Sulmi i fundit vdekjeprurës i ariut u raportua në vitin 2011.
Mes njoftimeve për pamjen në rritje të arinjve, arinjtë polarë dihet se janë nën stres për shkak të ngrohjes globale.
"Në këtë periudhë të vitit arinjtë polarë kanë sfida shtesë në gjetjen e ushqimit", ka thënë Jon Aars nga Instituti Polar Norvegjez për transmetuesin shtetëror NRK.
"Ka shumë kohë që ka patur akull në zonën kryesore të gjuetisë, kështu që ka më pak qasje në foka. Pra, ariu polar shpenzon më shumë kohë në tokë për të gjetur ushqim alternativ".
