Putin pret që konfliktet globale të vazhdojnë në të ardhmen e afërt

Presidenti rus Vladimir Putin deklaroi të enjten se pret vazhdimin e konflikteve në mbarë botën në të ardhmen e afërt, raporton Anadolu.

Putin, duke folur në një takim të Klubit të Diskutimit Valdai në Moskë, tha se e konsideron këtë mundësi “të lartë”.

“Vazhdimi i konflikteve ndërkombëtare në vitet e ardhshme është shumë i mundshëm. Do të doja shumë që të gabohesha”, theksoi ai.

Ai tha gjithashtu se ekzistojnë shqetësime të arsyeshme lidhur me funksionimin e OKB-së, e cila, sipas tij, po funksionon në një mënyrë “më pak kolegjiale dhe demokratike” sesa ishte parashikuar fillimisht.

“Rusia mbështet idenë e një reforme të drejtë të OKB-së, por kjo aktualisht është e pamundur pa një konsensus të brendshëm”, tha ai.

Putin gjithashtu mbrojti reformimin e strukturës së organizatës në mënyrë që ajo të pasqyrojë diversitetin e botës.

“Azia, Afrika dhe Amerika Latine duhet të luajnë rol gjithnjë e më të rëndësishëm në OKB”, tha ai.

Duke folur për inteligjencën artificiale, Putin tha se ekspertët po paralajmërojnë gjithnjë e më shumë se përhapja e saj mund të çojë në zhveshjen e njerëzve nga individualiteti i tyre dhe reduktimin e tyre në një emërues të përbashkët.

Ai paralajmëroi se zhvillimi i inteligjencës artificiale mund të çojë në “totalitarizëm digjital”.

“‘Totalitarizmi digjital’, i mundshëm në zhvillimin e inteligjencës artificiale, do të bëhet po aq pa rrugëdalje, i zymtë dhe kundër njerëzimit sa shoqëritë totalitare të së kaluarës”, tha ai.