Rritet aktiviteti i Vullkanit Sinabung në Indonezi

Vullkani Sinabung në rajonin Sumatra Veriore të Indonezisë ka hedhur hi vullkanik në qiell, transmeton Anadolu Agency (AA).

Siç raportohet, vullkani ka hedhur tym dhe hi rreth 3 kilometra lart.

Aktiviteti vullkanik në Sinabung është rritur gjatë ditëve të fundit, pasi brenda një jave janë regjistruar rreth 15 shpërthime.

Armen Putra nga ekipi i vëzhgimit të vullkanit, deklaroi se nuk ka pasur humbje jetësh si pasojë e shpërthimit dhe paralajmëroi fshatarët që jetojnë në afërsi të qëndrojnë 5 kilometra larg vullkanit dhe të jenë të përgatitur për rrezikun e lavës.

Ndryshe, në vitin 2014 dhe 2016, 23 persona humbën jetën nga shpërthimet e Vullkanit Sinabung, i cili u aktivizua në vitin 2010 pas afro 400 vitesh.