عێراق.. بەھۆی خۆڵبارینەوە کەسێک گیانی لەدەستدا

بەغدا-AA

بەھۆی ئەو خۆڵبارینەی کە بەغدا پایتەختی عێراق و چەندین پارێزگای وڵاتەکەی گرتووه‌ته‌وە، کەسێک گیانی لەدەستداوە و زیاتر لە پێنج ھەزار کەس دووچاری مەترسیی خنکان بوونەتەوە.

بەپێی ئامارەکانی فەرمانگەی کەشناسی عێراق، لە ئێوارەی دوێنێ چوارشەممەوە شەپۆلێکی خۆڵبارین لە بیابانەکانی رۆژئاوای وڵاتەکەوە دەستی پێکردووە و بەغدای پایتەخت و چەند پارێزگایەکی دیکەی گرتووەتەوە.

گوتەبێژی وەزارەتی تەندروستیی و ژینگەی عێراق، سەیف بەدر لە راگەیەندراوێکدا ئاماژەی بەوە کرد، به‌ مه‌به‌ستی پێشکەشکردنی چارەسەری پزیشکیی پێویست به‌و کەسانەی کە بەھۆی خۆڵبارینەکەوە دووچاری مەترسیی خنکان بوونەتەوە سەرجەم نەخۆشخانە و ناوەندە تەندروستییەکانی سەر بە وەزارەتی تەندروستی لە سەرجەم پارێزگاکان خراونەتە حاڵەتی ئامادەباشییەوە.

سەیف بەدر ئەوەشی ئاشکرا کرد، بەھۆی خۆڵبارینەکەوە کەسێک گیانی لەدەستداوە و ژمارەی ئەو کەسانەش کە توشی "تەنگە نەفەسی" و "کێشه‌ی کۆئەندامی ھەناسەدان" بوونەتەوە پێنج ھەزار کەسی تێپەڕاندووە، کە دوو ھەزار کەسیان لە بەغدای پایتەخت بوون.

گوتەبێژی وەزارەتی تەندروستیی و ژینگەی عێراق داوای لە هاووڵاتییان کردووە بە تایبەتی ئەوانەی نەخۆشیی تەنگە نەفەسی (رەبو) و ئەو کەسانەی کە نەخۆشیی درێژخایەنیان ھەیە لە کاتی خۆڵبارینەکەدا، لە ماڵەکانیان بمێننەوە و بۆ کاری زۆر پێویست نەبێت نەیەنە دەرەوە.