جێگری سەرۆکی ڤێنیزوێلا داوای ھاریکاریی لە حکوومەتی ئەمریکا کرد

ئەنقەرە ــ AA

جێگری سەرۆکی ڤێنیزوێلا، دێلسی ڕۆدریگێز داوای لە حکوومەتی ئەمریکا کرد کە ھاریکاری وڵاتەکەی بکات.

دێلسی ڕۆدریگێز لەلایەن دادگای باڵای ڤێنیزوێلاوە بە سەرۆکی کاتی ئەو وڵاتە دەست نیشان کرا، ئەوەش دوای ئەوەی سەرۆکی ئەو وڵاتە، نیکۆلاس مادۆرۆ ڕۆژی ٣ی ئەم مانگە، لەلایەن ھێزەکانی سوپای ئەمریکاوە دەستگیرکرا.

ئەمڕۆ دووشەممە، دێلسی ڕۆدریگێز لە ھەژماری خۆی لە "ئینستاگرام " پەیامێکی ئاراستەی جیھان و ئەمریکا کردووە و تیایدا جەختی لەوە کردووەتەوە کە وڵاتەکەی دەویەوێت، لە ژینگەیەکی ئارام و دوور لە ھەڕەشە دەرەکییەکاندا، بژیت.

ڕاشیگەیاندووە کە کاری لەپێشینەی بریتی دەبێت لە دامەزراندنی پەیوەندییەکی ھاوسەنگ و ڕێزلێگیراوە لەنێوان ڤێنیزوێلا و وڵاتانی دیکەی ناوچەکە.

ھەروەھا داوای ھاریکاریی لە حکوومەتی ئەمریکا کردووە کە لەسەر بنەمای گەشەپێدانی ھاوبەش بێت.

دێلسی ڕۆدریگێز بەشێکی پەیامەکەی ئاراستەی سەرۆکی ئەمریکا، دۆناڵد ترەمپ کردووە و ڕایگەیاندووە: " گەلەکانمان و ناوچەکەمان شایەنی ئاشتی و دیالۆگن، نەک جەنگ".