سەرکۆماری عێراق گەیشتە ئێران

ھەولێر – AA

سەرکۆماری عێراق، عەبدولـلەتیف رەشید بە سەرۆکایەتی شاندێکی باڵا گەیشتە ئێران.

نووسینگەی راگەیاندنی سەرۆکایەتی کۆماری عێراق بڵاوی کردەوە، ئەمڕۆ شەممە ٢٩ی نیسانی ٢٠٢٣، عەبدولـلەتیف رەشید بە سەرۆکایەتی شاندێکی باڵا گەیشتە ئێران.

بەگوێرەی راگەیەندراوەکە، هەریەک لە خانمی یەکەم، شاناز ئیبراهیم ئەحمەد، جێگری سەرۆکوەزیران و وەزیری دەرەوە، فوئاد حوسێن و وەزیری کارەبا، زیاد عەلی فازڵ و وەزیری دەرامەتە ئاوییەکان، عەبد عۆن زیاب و راوێژکاری ئاسایشی نەتەوەیی، قاسم ئەعرەجی و ژمارەیەک لە راوێژکار و بەرپرسانی باڵا یاوەری سەرکۆماری عێراقن بۆ ئێران.

ئەم سەردانەی سەرکۆماری عێراق لەسەر بانگهێشتی فەرمی سەرکۆماری ئێران، ئیبراهیم رەئیسی ئەنجام دراوە.

بڕیارە عەبدولـلەتیف رەشید لە میانی سەردانەکەی بۆ ئێران لەگەڵ سەرکۆماری ئێران، ئیبراھیم رەئیسی و ژمارەیەک بەرپرسی باڵای دیکەی ئەو وڵاتە کۆدەبێتەوە.

لە میانی کۆبوونەوەکانی سەرکۆماری عێراق و گەورە بەرپرسانی ئێران، رەوشی ھەردوو وڵات بە تایبەتی و رەشی ناوچەکە بە گشتیی تاوتوێ دەکرێت.

رۆژی ٢٤ی ئەم مانگە وەزیری دەرەوەی عێراق، فوئاد حوسێن لە میانی پەیوەندییەکی تەلەفۆنییدا لەگەڵ وەزیری دەرەوەی ئێران، حوسێن ئەمیر عەبدوڵڵاھیان رایگەیاندبوو کە بەم نزیکانە سەرکۆماری عێراق، عەبدولـلەتیف رەشید سەردانی تاران دەکات.