مەسعود بارزانی و عەلی باپیر لە هەولێر کۆبوونەوە

سەرۆکی پارتی دیموکراتی کوردستان، مەسعود بارزانی و سەرۆکی کۆمەڵی دادگەریی کوردستان، عەلی باپیر لە پیرمام کۆبوونەوە

کۆمەڵی دادگەریی کوردستان بڵاویکردووەتەوە کە شاندێکی حزبەکەیان بە سەرۆکایەتی، مامۆستا عەلی باپیر سەردانی پیرمامیان کردووە و لەلایەن سەرۆکی پارتی دیموکراتی کوردستان مەسعود بارزانی پێشوازییان لێکراوە.

لە ھەواڵەکەی کۆمەڵی دادگەریی، ئاماژە بەوەکراوە کە قەیرانەکانی مووچە، نرخی سووتەمەنی و بارودۆخی ژیانی ھاووڵاتیان تەوەری سەرەکیی کۆبوونەوەکە بوون و ھەردوو لا جەختیان لەسەر پێویستی دۆزینەوەی چارەسەرێکی گونجاو بۆ ئەو کێشانە کردەوە.

ئەوەشخراوتەڕوو کە پاراستنی قەوارەی ھەرێمی کوردستان و دوورخستنەوەی لە ئاڵۆزییەکانی ناوچە، بابەتێکی دیکەی گفتووگۆ بوو. لەم پەیوەندییەدا جەخت لەسەر گرنگی تەبایی و سازانی نێوان ھێزە سیاسییەکان و پێویستی ئەنجامدانی کۆبوونەوەی لووتکە بۆ چارەسەرکردنی کێشە ھەرێمییەکان کرایەوە.

سەرنج خراوەتە سەر ئەوەش کە لە کۆتایی کۆبوونەوەکەدا، ھەردوو لا باسیان لە گەشەپێدانی پەیوەندییەکانی نێوان کۆمەڵی دادگەریی کوردستان و پارتی دیموکراتی کوردستان و بەھێزکردنی ھاوکارییە سیاسییەکان کرد.