Fatjon Cuka
01 Октомври 2026•Ажурирано: 01 Октомври 2026
Министерот за Европа и надворешни работи на Албанија, Ферит Хоџа, изјави дека безбедноста на Западен Балкан и безбедноста на Европа се неразделни, пренесува Анадолу.
Хоџа учествуваше на состанокот на министрите за надворешни работи на Берлинскиот процес во Будва, Црна Гора, а на социјалните мрежи истакна дека на состанокот ја потврдил „непоколебливата посветеност“ на Албанија за побезбеден, поконкурентен и подобро поврзан Западен Балкан.
„Безбедноста на Западен Балкан и безбедноста на Европа се неразделни. Во сè покомплексното геополитичко опкружување, одговорот на нашите заеднички предизвици лежи во посилна соработка, поголемо единство и постабилна и поспособна Европа за справување со предизвиците. А за нас, тоа има едно име: проширување. Не како услуга или награда, туку како процес заснован врз заслуги и поддржан од значајни и суштински реформи, а истовремено и како стратегиска инвестиција во долгорочната безбедност, стабилност и конкурентност на Европа“, рече тој.
Шефот на албанската дипломатија додаде дека една од најважните лекции од Берлинскиот процес е дека европската интеграција започнува дома, многу пред членството.
„Таа (интеграцијата) напредува преку практичната соработка, мобилноста и контактите меѓу луѓето, меѓусебното признавање на дипломите, поврзаноста и регионалниот заеднички пазар, односно преку конкретни достигнувања што го подобруваат животот на граѓаните, ги продлабочуваат регионалните врски и сè повеќе ги приближуваат нашите општества до Европската Унија“, додаде Хоџа.
Според министерот Хоџа, за Албанија, прашањето веќе не е дали Западен Балкан ѝ припаѓа на Европската Унија, туку „вистинското прашање денес е дали сите заедно имаме храброст, решителност и политичка волја да го исполниме европското ветување и да го завршиме последниот дел од обединувањето на нашиот континент“.
Toj истакна дека на идната генерација ѝ должат повеќе од уште едно ветување за европска перспектива, додавајќи дека ѝ ја должат сигурноста на европската иднина, изградена, како што рече, врз мирот, просперитетот, демократските вредности и заедничката судбина.
