Сирискиот претседател изврши историско плаќање со картичка „Виза“

Сирискиот претседател Ахмед ал-Шара плати со картичка „Виза“ во Дамаск, означувајќи нов чекор во напорите на земјата повторно да се поврзе со глобалниот финансиски систем по долгогодишните санкции, јавува Анадолу.

Вчера Ал-Шара електронски плати во ресторан во Стариот Дамаск, според видеото објавено од сириската телевизија.

За време на трансакцијата бил присутен и гувернерот на Централната банка на Сирија, Сафват Раслан.

Глобалната компанија за дигитални плаќања „Виза“ денес соопшти дека успешно тестирала меѓународна трансакција со картичка во реално време во Сирија, опишувајќи го тоа како важен чекор кон овозможување меѓународните посетители да ги користат своите картички „Виза“ во земјата.

Компанијата соопшти дека работела заедно со Централната банка на Сирија и партнерите „Франсабанк“ и „Пејмера“ за извршување на трансакцијата.

Од „Виза“ наведоа дека овој чекор ги поддржува пошироките напори за проширување на можностите за дигитални плаќања и зајакнување на поврзаноста на Сирија со глобалната дигитална економија.

Развојот на настаните следува во време кога Сирија се обидува да ја обнови својата економија и повторно да се поврзе со меѓународните пазари по укинувањето на санкциите.

Говорејќи на отворањето на 63. Меѓународен саем во Дамаск вчера, Ал-Шара изјави дека Сирија влегла во нова фаза на реконструкција и развој по укинувањето на санкциите, изразувајќи надеж дека земјата може повторно да ја преземе својата улога на мост меѓу пазарите, трговски коридор и економски центар што ги поврзува Истокот и Западот.

Американското Министерство за финансии во понеделникот објави дека ја отстранило Сирија од својата листа на држави спонзори на тероризмот, исполнувајќи ги обврските на администрацијата на Трамп за олеснување на санкциите.

Сирија се наоѓаше на оваа листа од 1979 година.