Катакомбите Кум еш-Шукафа во Египет сведочат за 2.000-годишната историја на Александрија

Подземните катакомби Кум еш-Шукафа, кои се наоѓаат во Александрија, на северот на Египет, до кои се стигнува преку спирални скали што се спуштаат повеќе од 10 метри под земја, даваат информации за околу 2.000-годишната култура и историја на регионот, пишува Анадолу.

Историската градба, која датира од 2 век од нашата ера и се одликува со ходници што водат до широки сали и погребни комори, во архитектонскиот дизајн и украсите ги спојуваат трагите од египетската и римската цивилизација.

Локалитетот, кој се смета за еден од најистакнатите примери на архитектура со катакомби составена од подземни гробници и ходници издлабени во карпа, се издвојува со богатите украси и сложениот распоред.

Според податоците на египетското Министерство за туризам и антиквитети, овие остатоци го добиле името Кум еш-Шукафа, што значи куп скршени садови, поради големото количество фрагменти од керамички садови собрани на локалитетот.

- Римска гробница во Александрија -

Египетскиот археолог Меџди Шакир во изјавата за Анадолу рече дека во римскиот период луѓето што ги посетувале гробниците за време на погребните церемонии тука ги оставале глинените садови што ги користеле, а со текот на времето, поради таложењето на скршените садови, областа станала позната како Кум еш-Шукафа.

Опишувајќи го Кум еш-Шукафа како една од најважните и најцелосно зачуваните историски градби во Александрија, Шакир објасни дека градбата издлабена во карпа има архитектонски распоред со спирални скали, сали за посетители и простории за погребни гозби.

Шакир истакна дека релјефите и украсите на локалитетот ги одразуваат сфаќањата на старите Египќани и Римјани за смртта и бесмртноста.

Нагласувајќи дека архитектонските и визуелните карактеристики на историскиот локалитет имаат потенцијал да привлечат туристи од целиот свет, Шакир истакна дека во промотивните активности треба да се користат современи технологии за презентација.

Тој предложи со користење на тридимензионално интерактивно осветлување, звучни и музички настапи, како и технологии со вештачка интелигенција, приказната за откривањето и историјата на гробниците да се претстави со кинематографски наратив според меѓународни стандарди.

- Откриени случајно -

Според податоците на Министерството за антиквитети, градбата првично била изградена во 2 век од нашата ера како приватна гробница за богато римско семејство што живеело во античка Александрија.

Со намалувањето на просторот за гробници во областа, особено во 3 и 4 век, подземните гробишта биле претворени во јавни гробишта, а ходниците се користеле до крајот на 4 век.

Според информациите објавени на веб-страницата на египетското Претседателство, градбата се состои од три нивоа издлабени во карпа, меѓусебно поврзани со спирални скали, при што висината на скалите постепено се намалува како што се приближуваат до површината.

Ходниците, кои со векови биле скриени под земјата, случајно се откриени во 1900 година.

Од моментот на откривањето, локалитетот со години бил загрозен, особено поради проблемот со зголемувањето на подземните води во долните нивоа.

Во март 2019 година египетските власти го завршиле проектот за намалување на нивото на подземните води што во тоа време чинел 5,7 милиони долари.

Благодарение на оваа работа, најниското ниво на ходниците првпат било отворено за посетителите 119 години по нивното откривање.

Тогашниот министер за антиквитети, Калед ел-Анани, изјави дека работите биле започнати во мај 2016 година откако поради подземните води се одвоил дел од ѕидот на гробницата со дебелина од околу 2 сантиметра.

Ел-Анани истакна дека благодарение на проектот, долниот кат на градбата првпат од 1900 година можел да се види во сува состојба.