Melike Pala
23 Септември 2026•Ажурирано: 23 Септември 2026
Норвешкиот јавен сервис НРК прати писмо со изразена загриженост до Европската радиодифузна унија (ЕБУ) по годинашниот Избор за песна на Евровизија, посочувајќи на загриженоста во врска со учеството на Израел и примената на правилата на натпреварот, пренесува Анадолу
Уредникот на забавната програма на НРК, Јостајн Олсенг, денес ја потврди информацијата за писмото, за кое претходно извести норвешкиот весник ВГ.
„Праќаме писма по секое финале за да дадеме повратни информации за тоа како може да се подобри натпреварот“, изјави Олсенг, додавајќи дека уредничкиот тим изразил „јасна загриженост“ во врска со учеството на Израел.
Олсенг рече дека НРК е особено загрижен за тоа дали системот за гласање на натпреварот ги одразува музичките преференции или, пак, може да биде под влијание на национални или геополитички фактори.
„Почнавме да се сомневаме дека гласањето не одразува кои песни се најдобри, туку која земја ја поддржуваме“, рече тој.
Олсенг нагласи дека ставот на НРК е оти правилата треба да се применуваат подеднакво за сите земји учеснички.
„За нас е важно да се почитуваат правилата што ги има ЕБУ. Во спротивно, загрижени сме дека натпреварот ќе стане нешто поинакво од она што е замислено“, рече тој.
На прашањето дали НРК смета дека на Израел треба да му се дозволи учество, Олсенг одговори дека земјите што ги почитуваат правилата и се членки на ЕБУ треба да имаат право на учество.
Изборот за песна на Евровизија се соочи со зголемен надзор за учеството на Израел, поради геноцидната војна во Газа и пошироките политички тензии поврзани со натпреварот.
Неколку земји, како Шпанија, Холандија и Ирска, го бојкотираа годинашниот Избор за песна на Евровизија во знак на протест поради учеството на Израел.
