Бројот на убиени во рускиот ракетен напад врз украинскиот град Прилуки се зголеми на 22

Бројот на убиени во вчерашниот руски ракетен напад врз украинскиот град Прилуки во северниот регион Чернигов се зголеми на 22, соопштија локалните власти денес, пренесува Анадолу.

„Во Прилуки се убиени 22 лица. Меѓу нив има пет деца. Четири го загубија животот на местото на нападот, а едно дете почина во болница. Повеќе од 50 лица се повредени“, изјави гувернерот на Чернигов, Вјачеслав Чаус, во објавата на Телеграм.

Чаус рече дека во нападот вчера попладне бил погоден и регионалниот главен град Чернигов, при што се запалила трикатна зграда, а пожарот бил изгаснат.

Украинскиот претседател Владимир Зеленски тврди дека ракета Х-101 погодила станбена зграда во Прилуки.

„Потребни се дополнителни пакети ракети за противвоздушна одбрана, како и дополнителни мерки за поддршка на Украина. И ќе има соодветни пакети“, рече тој.

„Заканата е присутна секој ден, а нашите батерии за противвоздушна одбрана секојдневно мора да имаат подготвени ракети. Затоа сметаме на брзи испораки од нашите партнери и на доволно производство.“

Украинските воздухопловни сили соопштија дека нивната противвоздушна одбрана соборила 117 од 130 беспилотни летала, како и најмалку 44 балистички и крстосувачки ракети лансирани од Русија во текот на ноќта.

Руското Министерство за одбрана соопшти дека извршило „масовен напад“ врз објекти на украинскиот военоиндустриски комплекс во Киев и регионот на Киев, како и во регионите Чернигов, Кировоград, Днепропетровск, Полтава, Харков и Одеса.