Mohammad Sio
17 Септември 2026•Ажурирано: 17 Септември 2026
Јордан и Франција денес потпишаа договор за одбранбена соработка во присуство на јорданскиот крал Абдула Втори и францускиот претседател Емануел Макрон во Париз, јавува Анадолу.
„Со претседателот Макрон разговарав за начините за унапредување на нашите долгогодишни билатерални односи и континуираната координација, а присуствувавме и на потпишувањето на договорот за одбранбена соработка“, напиша кралот Абдула на американската платформа за социјални медиуми Х.
Тој не даде детали за договорот ниту за областите што ги опфаќа одбранбената соработка.
Јорданскиот крал соопшти дека тој и Макрон, исто така, се сретнале со либанскиот претседател Жозеф Аун и ја истакнале важноста Париз да биде домаќин на нова рунда состаноци во рамките на Процесот Акаба, во знак на поддршка на либанската армија.
„Со нетрпение очекуваме да продолжиме со нашата работа за постигнување стабилност во Либан и во регионот“, рече Абдула.
Јорданскиот Кралски двор вчера соопшти дека Абдула, Макрон и Аун денес ќе претседаваат со нова рунда состаноци на Процесот Акаба во Париз, на кои ќе се разговара за начините за поддршка на либанската армија.
Кралот Абдула го започна Процесот Акаба во 2015 година, со цел зајакнување на координацијата, соработката и размената на експертиза меѓу регионалните и меѓународните партнери во борбата против тероризмот и екстремизмот.
Претходно рунди на состаноци се одржаа во Јордан и во неколку други земји, меѓу кои Шпанија, Албанија, Индонезија, Италија, Бразил, Бугарија и САД.
Вчера во Париз кралот Абдула се сретна со Аун и ја потврди поддршката на Јордан за Либан, како и за неговата безбедност, стабилност и суверенитет, соопшти Кралскиот двор.
Исто така, тој повика на прекин на израелските напади врз либанска територија.
Израел спроведува напади врз Либан од 2 март, при што загинаа најмалку 4.381 лице, 12.402 се повредени, а повеќе од еден милион лица се раселени, според либанските власти.
Нападите продолжија и покрај рамковниот договор меѓу Либан и Израел од 26 јуни, постигнат со посредство на САД, со кој е предвидено постепено израелско повлекување од окупираната либанска територија во замена за распоредување на либанската армија и разоружување на вооружените групи, вклучително и Хезболах.
Израел окупира области во Јужен Либан, некои со децении, а други беа заземени за време на војната во 2023-2024 година. Во текот на последните борби израелските сили навлегоа повеќе од 10 километри на либанска територија.
