Албаниз го повика Трамп да ја изземе Австралија од најновите американски царини

Австралискиот премиер Ентони Албаниз го повика американскиот претседател Доналд Трамп да ја изземе Австралија од најновиот пакет царини на Вашингтон, велејќи дека Трамп се согласил да го разгледа барањето, пренесува Анадолу.

Албаниз денес на својот профил на американската компанија за социјални медиуми Х соопшти дека имал „одличен“ разговор со Трамп, опишувајќи го 75-годишниот сојуз меѓу Австралија и САД како однос што „станува сè посилен“.

„Двете земји ќе продолжат тесно да соработуваат во областа на критичните минерали, вештачката интелигенција и безбедносното партнерство АУКУС“, додаде тој.

Телефонскиот разговор траел околу 40 минути и бил „продуктивен, конструктивен и суштински“, објави австралискиот „Еј-би-си њуз“.

Албаниз рече дека од Трамп побарал да разгледа целосно изземање на Австралија од американската царина од 12,5 отсто воведена во јули или, во најмала рака, да ја задржи претходната стапка од 10 отсто.

Австралиската Влада ја оспори оправданоста на Вашингтон за царината, која беше поврзана со загриженоста за принудната работа во синџирите на снабдување, тврдејќи дека за оваа мерка „нема веродостојна доказна основа“, објави „Еј-би-си њуз“.

Премиерот рече дека ги истакнал мерките на Канбера против современото ропство и го нагласил економскиот однос на Австралија со САД.

Исто така, тој му кажал на Трамп дека САД во изминатите 20 години оствариле трговски суфицит од 442 милијарди долари со Австралија.

„Многу јасно му го изложив аргументот на претседателот, како пријател на Соединетите Американски Држави, дека би побарале ова да биде разгледано“, рече Албаниз.