Британија, Австралија и Канада: Срамна е одлуката на Израел да ја затвори истрагата за нападот врз „Ворлд сентрал кичен“

Велика Британија, Австралија и Канада денес ја нарекоа „срамна“ одлуката на Израел да не започне кривична истрага за смртоносниот напад врз конвојот на хуманитарната организација „Ворлд сентрал кичен“ (WCK) во Газа во 2024 година, јавува Анадолу.

Во заедничкото соопштение, Министерствата за надворешни работи на трите земји наведоа дека повеќе од две години вршеле притисок врз Израел брзо и темелно да го испита случајот и одговорните да бидат повикани на одговорност.

„Објавата на Израелските одбранбени сили (ИДФ) од 19 август 2026 година дека нема да подигнат кривична истрага за овој напад, без дополнително објаснување, е срамна“, се наведува во соопштението.

Трите земји го повикаа Израел да ги исполни своите обврски според меѓународното хуманитарно право и истакнаа дека мора да направи повеќе за да обезбеди хуманитарните работници да можат безбедно да ги извршуваат своите должности.

Соопштението следува откако израелската војска во средата соопшти дека ќе истражи два случаи за кои постои сомнеж дека се воени злосторства во Појасот Газа, додека ќе затвори три други истраги од висок профил, меѓу кои и истрагата за нападот врз „Ворлд сентрал кичен“ во 2024 година, во кој беа убиени седум хуманитарни работници.