Во израелските напади во Газа една Палестинка загина, пет лица се ранети и покрај прекинот на огнот

Палестинка е убиена, а пет лица се повредени денес во израелските напади врз неколку области во Појасот Газа и покрај прекинот на огнот што е во сила, соопштија медицински извори, јавува Анадолу.

Медицински извор од болницата „Ал-Шифа“ за Анадолу изјави дека Палестинка е убиена, а нејзиниот сопруг тешко повреден во израелски воздушен напад врз нивниот дом на улицата „Ал-Вехда“ во Газа.

Дополнително, повикувајќи се на очевидци, дописникот на Анадолу јави дека израелски хеликоптер истрелал најмалку една ракета врз нивниот дом.

Претходно, три Палестинци, меѓу кои и една жена, беа повредени во израелските воздушни напади врз два евакуирани дома во населбата Шуџаија, источно од градот Газа, според очевидци и локални извори.

Во меѓувреме, израелската артилерија гранатирала области источно од населбите Шуџаија и Зејтун во градот Газа, додека израелските беспилотни летала од типот квадкоптер бомбардирале домови.

Во централниот дел на Газа, локални извори соопштија дека израелско беспилотно летало фрлило бомба источно од бегалскиот камп Бурејџ, додека воените возила распоредени источно од кампот отвориле силен оган кон палестинските домови. Нема информации за жртви.

Во јужниот дел на Појасот Газа, медицински извор соопшти дека Палестинка била повредена од куршум во грбот откако израелските воени возила отвориле силен оган во областа Кизан Абу Рашван, јужно од Кан Јунис.

Според Министерството за здравство во Газа, израелските прекршувања на договорот за прекин на огнот од октомври 2025 година резултирале со смрт на 1.422 Палестинци и повредување на 4.996 заклучно со вчерашниот ден.

Од 8 октомври 2023 година, во израелската војна во Појасот Газа убиени се повеќе од 74.000 Палестинци, а над 175.000 се повредени, додека околу 90 отсто од инфраструктурата во енклавата се уништени.