Израелските сили урнаа станбена зграда во Источен Ерусалим, извршија рации во неколку домови на Западниот Брег

Израелските сили денес урнаа петкатна станбена зграда во окупираниот Источен Ерусалим, додека војниците извршија рации во неколку домови во рамки на воените операции низ Западниот Брег, соопштија локалните власти и медиумите, јавува Анадолу.

Израелските сили ја урнаа зградата со 10 станови во населбата Ал-Тур, по еден ден откако на жителите им било доставено последното известување за уривање, соопшти Гувернерството на Ерусалим.

„Израелските власти со години ги прогонуваа жителите со наредби за уривање и парични казни, додека одбиваа да им издадат градежни дозволи“, се додава во соопштението на Гувернерството.

Според Гувернерството на Ерусалим, израелските власти спровеле 139 операции за уривање и расчистување на земјиште во Источен Ерусалим во периодот од јули до септември и издале 150 известувања или наредби за уривање, иселување и одземање имот.

Канцеларијата на ОН за хуманитарни прашања документирала околу 170 палестински објекти урнати во окупираниот град од почетокот на 2026 година, главно под образложение дека немаат градежни дозволи издадени од Израел, за кои ОН наведуваат дека Палестинците речиси и да не можат да ги добијат.

Во меѓувреме, израелските сили извршиле рација во градот Бани Наим, источно од Хеброн, во јужниот дел на Западниот Брег, претресле неколку домови и ја прогласиле областа за „затворена воена зона“.

Војниците, исто така, претвориле три куќи во воени пунктови и ги спречиле учениците да стигнат до некои училишта, објави официјалната новинска агенција Вафа.

Во селото Тел, југозападно од Наблус, израелските сили и доселениците повторно влегле во дом што претходно бил користен како воен пункт и принудиле едно палестинско семејство да го напушти домот, кратко време откако му било дозволено да се врати, објави Вафа.

Одделно, израелските доселеници запалиле четири возила во Акбара, јужно од Наблус, и испишале расистички пароли со повици за одмазда. Друга група доселеници се обиделе да запалат објект за одгледување живина на фарма во Фарха, западно од Салфит, и испишале пароли на фарма за добиток.

Според Палестинската комисија за колонизација и отпор на Ѕидот, израелските доселеници извршиле повеќе од 14.742 напади низ Западниот Брег, вклучително и во Источен Ерусалим, од октомври 2023 година, при што загинале 66 Палестинци.