Централно Токио бележи рекордни 34 последователни дождовни денови

Централно Токио денес го забележа 34-тиот последователен ден со дожд, што претставува најдолг ваков период откако се водат метеоролошки записи, соопшти Јапонската метеоролошка агенција, јавува Анадолу.

Во јапонската престолнина врне секој ден од 27 август, а приближувањето на тајфуни, неподвижен есенски дождовен фронт и долина на низок воздушен притисок придонесоа за продолжениот период со врнежи, објави агенцијата „Кјодо њуз“, повикувајќи се на метеоролошката агенција, пренесува Анадолу.

Претходниот рекорд изнесуваше 33 последователни денови со врнежи, забележани од 27 јуни до 29 јули 2019 година.

Најобилните врнежи во тековниот период беа регистрирани на 21 септември, кога во централно Токио наврнаа 156 милиметри дожд.

Вкупната количина врнежи во централно Токио вчера достигна 629 милиметри, што е приближно трипати повеќе од просечната количина врнежи за целиот септември, според „Кјодо“.

Дождот денес зафати и големи делови од источна и западна Јапонија.

Во Ечизен, во централната јапонска префектура Фукуи, во раните утрински часови денес биле регистрирани повеќе од 30 милиметри дожд за само еден час.

Не се очекува продолжениот период на врнежи да заврши наскоро.

Се прогнозира дека дождот ќе продолжи главно во источна Јапонија приближно до четврток, делумно поради задржувањето на есенскиот дождовен фронт, објави „Кјодо“.

Есенскиот дожд во Јапонија вообичаено носи подолги периоди на нестабилно време, кога сезонските воздушни маси стапуваат во интеракција над земјата.