Шефицата на ММФ предупредува: Светската економија се соочува со енергетски шокови, но и побарувачка на ВИ

Глобалната економија се соочува со двоен притисок: негативен шок во понудата на енергенти и позитивен шок во побарувачката на вештачка интелигенција (ВИ), изјави денес шефицата на Меѓународниот монетарен фонд, јавува Анадолу.

Кристалина Георгиева одржа говор во Сингапур во пресрет на претстојните годишни состаноци во Тајланд, истакнувајќи дека глобалната економија мора да се справи со три големи спротивставени струи: брзиот развој на вештачката интелигенција, постојано високите цени на енергентите и рекордните нивоа на јавен долг.

Таа посочи дека глобалниот јавен долг наскоро ќе надмине 100 % од бруто-домашниот производ, достигнувајќи го највисокото ниво од крајот на Втората светска војна.

„Најразвиените економии предничат во негативна смисла, со некои од највисоките нивоа на бруто-долг“, рече Георгиева.

Генералната директорка истакна дека спротивставени сили ја влечат глобалната економија во две различни насоки.

Георгиева предупреди дека цените на нафтата остануваат на ниво од околу 100 долари за барел поради транспортните трошоци и други ризици.

Таа нагласи дека снабдувањето со природен гас од регионот на Персискиот Залив е сериозно попречено бидејќи транспортот низ Ормускиот Теснец е изложен на закани.

На технолошки план, Георгиева изјави дека хардверот за вештачка интелигенција и сродните производи сега сочинуваат повеќе од 10 % од светската трговија со стоки.

Таа додаде дека вештачката интелигенција на крајот би можела да придонесе со дополнителен годишен раст на светската економија од 0,5 %, доколку земјите правилно управуваат со неа.

Георгиева ги повика креаторите на економската политика да престанат да ги одложуваат неопходните чекори и да спроведат кредибилни планови за фискална консолидација.

Таа исто така ги советуваше централните банки во различни земји да задржат внимателен, рестриктивен став во своите монетарни политики, бидејќи експанзијата во секторот на вештачка интелигенција, енергетските шокови и високиот јавен долг ја поттикнуваат инфлацијата.