Јордан и Заливскиот блок ги осудија нападите на Хусите врз цивилната инфраструктура во Саудиска Арабија

Јордан и Советот за соработка на арапските држави од Заливот (ГСС) денес ги осудија нападите на Хусите врз Саудиска Арабија, вклучително и нападите врз два аеродрома во јужниот дел на земјата, пренесува Анадолу.

Јорданскиот министер за надворешни работи Ајман Сафади телефонски разговарал со својот саудиски колега, принцот Фејсал бин Фархан, и изразил „апсолутна солидарност“ на Јордан со Саудиска Арабија поради нападите на Хусите, соопшти Министерството за надворешни работи.

Сафади изјавил дека Аман ги поддржува сите мерки што ги презема Ријад за заштита на својата безбедност, стабилност, суверенитет и граѓани.

Тој повторно ги осудил нападите на Хусите врз Саудиска Арабија, вклучително и обидите за напади врз светите муслимански градови Мека и Медина, како и континуираните напади врз цивилни и економски објекти.

Сафади, исто така, ја потврдил поддршката на Јордан за меѓународно признатата Влада на Јемен и за напорите за решавање на конфликтот „на начин што ќе ги обнови безбедноста и стабилноста и ќе го зачува единството и суверенитетот на земјата“, соопшти Министерството.

Двајцата министри разговарале и за регионалните случувања и напорите за прекин на тековната ескалација во регионот.

Одделно, генералниот секретар на ГСС, Џасем Мохамед Албудаиви, остро ги осуди нападите врз Меѓународниот аеродром „Крал Абдула бин Абдулазиз“ во Џазан и Меѓународниот аеродром во Наџран, во јужниот дел на Саудиска Арабија.

Албудаиви изјави дека нападите врз аеродромите и цивилните објекти од страна на Хутите претставуваат „опасна ескалација“ и „директна закана“ за цивилите и воздушниот сообраќај.

Тој изрази целосна поддршка на земјите членки на ГСС за Саудиска Арабија и за мерките што ги презема Кралството за заштита на својата безбедност, стабилност и територија.

Генералната управа за цивилно воздухопловство на Саудиска Арабија денес соопшти дека двата аеродрома биле нападнати синоќа, при што три лица се здобиле со полесни повреди, а била причинета и материјална штета.

Јеменските Хуси потврдија дека извршиле ракетни напади и напади со беспилотни летала низ Саудиска Арабија, вклучително и врз, како што ги опишаа, чувствителни цели во Џазан и Наџран.