Në rajon kremtohen Krishtlindjet ortodokse

SHKUP (AA) – Të krishterët ortodoksë në vendet e rajonit sot kremtojnë festën e Krishtlindjeve, ku kanë mbajtur liturgji, raporton Anadolu Agency (AA).

Prijësi i Kishës Ortodokse të Serbisë, patriarku Irinej, shërbeu liturgjinë e mëngjesit të Krishtlindjeve në Tempullin e Shën Sava në Beograd, ku morën pjesë qindra besimtarë ortodoksë.

Besimtarët ortodoksë në Bosnjë e Hercegovinë, festën e Krishtlindjeve e pritën me liturgjitë e shenjta nëpër kishat e mbarë vendit, ndërsa liturgjia qendrore u mbajt në Kishën kryesore në Sarajevë, nga ana e mitropolitit Hrizostom.

Në Mal të Zi, në kryeqytetin Podgoricë, si dhe në shumë qytete malazeze u mbajtën liturgji. Në tempullin “Ringjallja e Krishtit” mitropoliti Amfilohie mbajti liturgjinë.

Po ashtu edhe në Zagreb besimtarët u mblodhën për të shënuar festën e Krishtlindjeve. Në tempullin “Shpërfytyrimi i Zotit” u mbajt liturgjia të cilën e kryesoi mitropoliti i Zagrebit dhe Lubjanës, Porfiri Periq.

Ndryshe, besimtarët ortodoksë sot shënojnë festën e lindjes së Jezu Krishtit, të cilën e festojnë sipas Kalendarit Julian.