هۆشداری سەرکۆماری چین شی بۆ ترەمپ سەبارەت بە پرسی تایوان

سەرۆکی چین، شی جین پینگ لە کۆبوونەوەی لەگەڵ سەرۆکی ئەمریکا، دۆناڵد ترەمپ ئاماژەی بەوە کرد ئەگەر پرسی تایوان بە شێوەیەکی گونجاو مامەڵەی لەگەڵ نەکرێت، ئەوا ئەگەری هەیە ئەمریکا و چین تووشی پێکدادان ببن، ئەمەیش پەیوەندییەکان دەخاتە مەترسییەکی گەورەوە.

بەپێی ئاژانسی هەواڵی شینخوا، شی لە میانی کۆبوونەوەی لەگەڵ سەرۆکی ئەمریکا ترەمپ لە پەکین، باسی لەوە کردووە پاراستنی ئاشتیی و سەقامگیریی لە گەرووی تایوان، گەورەترین خاڵی هاوبەشی نێوان هەردوو وڵاتە.

شی بە ئاماژەدان بەوەی پرسی تایوان گرنگترین بابەتە لە پەیوەندییەکانی ئەمریکا-چین، بە ترەمپی ڕاگەياندووە: "ئەگەر پرسی تایوان بە باشی بەڕێوە ببرێت، سەقامگیریی پەیوەندییەکان دەپارێزرێت، بە پێچەوانەوە ئەگەری هەیە لە نێوان هەردوو وڵاتدا پێکدادان ڕوو بدات و پەیوەندییەکان بکەونە مەترسییەکی گەورەوە".