Див мајмун фатен во Индонезија по нападите во кои се повредени 17 лица

Властите во Индонезија фатија див мајмун за кој се сомневаат дека повредил најмалку 17 лица во нападите што траеле со недели во покраината Риау, јавија локалните медиуми, пренесува Анадолу.

Животното било фатено во градот Тембилахан, во округот Индрагири Хилир, во акција на тим составен од полиција, војска, пожарникари и службеници за заштита на дивиот свет, објави индонезискиот портал „ЈПНН“.

Началникот на полицијата во Индрагири Хилир, Дони Еко Листианто, изјави дека Агенцијата за заштита на природните ресурси на Риау поставила три стапици на локации за кои се сметало дека мајмунот ги користел како засолниште. Животното било фатено во една од нив.

Властите сметаат дека токму овој мајмун е одговорен за нападите што започнале на 25 јули.

Весникот „Џакарта пост“ објави дека до четвртокот биле нападнати 17 лица, меѓу кои деца и постари жители, откако група долгоопашести макаци (Macaca fascicularis) се појавила во околината на Тембилахан.

Се претпоставува дека нападите ги извршувал голем возрасен мажјак, кој напаѓал луѓе на улица, пред нивните домови, па дури и во некои куќи. Кај неколкумина од повредените имало потреба од шиење на раните.

Поради нападите, локалните власти наредиле училиштата во округот Тембилахан да преминат на онлајн настава во траење од три дена, почнувајќи од средата, поради загриженост за безбедноста на учениците.

Според „ЈПНН“, официјалните лица соопштиле дека фатеното животно одговара на описите што ги дале жртвите и сведоците, вклучително и по големината, агресивното однесување и препознатливата лузна на лицето.