Американскиот амбасадор во Рим: Трамп нема ништо лично против Мелони, ги искажува фрустрациите од НАТО

Американскиот амбасадор во Италија, Тилман Фертита, изјави дека претседателот Доналд Трамп нема ништо лично против италијанската премиерка Џорџа Мелони, туку дека ги искажува своите фрустрации во врска со НАТО, објави „Вашингтон пост“, пренесува Анадолу.

Фертита за весникот изјави дека Трамп „нема личен проблем“ со Мелони и дека неговите критики се одраз на пошироките фрустрации во врска со НАТО.

Мелони и Трамп генерално одржуваа блиски односи, но односите започнаа да заладуваат откако Трамп го критикуваше придонесот на Европа кон НАТО и нејзината ограничена поддршка за војната во Иран.

Раздорот дополнително се продлабочи откако Трамп го критикуваше папата Лав XIV, а подоцна тврдеше дека Мелони „го молела“ за фотографија на самитот на Г7 во Франција.

Фертита рече дека Трамп и Мелони добро се согласувале пред нивниот однос да се залади поради одбивањето на Рим да ја поддржи војната во Иран, додавајќи дека на италијанската страна ѝ советувал спорот да не се претвора во нешто поголемо од она што е.

„Она што го кажав е: ‘Не сакате да влезете во вербален одбојкарски натпревар со Доналд Трамп’, бидејќи тој е немилосрден и ќе победи“, рече тој.

Фертита рече дека политичарите низ светот треба да разберат како да се справуваат со Трамп.

„Ако не ви создава проблеми, тогаш не сте вредни за неговото време“, додаде тој.